नेपाल–स्कटल्यान्ड भिड्दै: खाँचो स्पष्ट जितको

काठमाडौँ — आयोजक जिम्बावे र स्कटल्यान्डले पहिलो दुवै खेल जितेपछि विश्वकप छनोट क्रिकेटमा नेपालका लागि धेरै समीकरण बाँकी छैन । जिम्बावेमा भइरहेको प्रतियोगितामा नेपालले बाँकी ३ खेलमा स्पष्ट विजय हात पार्नुपर्छ । सुपर सिक्समा पुग्न अफगानिस्तान र हङकङको चाहिँ खेल जित्नैपर्छ ।

यस्तोमा नेपालले बिहीबार स्कटल्यान्डको सामना गर्नेछ । नेपालसँगको खेलमा विजय हात पारेमा स्कटल्यान्ड सुपरि लगमा पुग्नेछ । समूह ‘बी’ को अर्को खेलमा अफगानिस्तानले हङकङको सामना गर्नेछ । दुवै टोली नेपालजस्तै पहिलो जितको खोजीमा छन् ।

 

नेपाल आइतबार बुलाबायोस्थित क्वीन्स स्पोर्टस क्लबमा भएको खेलमा जिम्बावेसँग १ सय १६ रनले पराजित भएको थियो । जिम्बावेले ३८०–६ को स्कोर बनायो, जुन नेपालले ५० ओभर खेलमा खर्चेको सबैभन्दा बढी रन हो । जिम्बावेले दोस्रो म्याच यही मैदानमा अफगानिस्तानविरुद्ध १ सय ९६ रन बनाउँदै २ रनले जितेको थियो । जिम्बावेसँग २६४–८ को स्कोर बनाउदै नेपालले ब्याटिङमा केही आशा देखाएको थियो ।

 

‘स्कटल्यान्डले निकै राम्रो खेलिरहेको छ, उनीहरूलाई हराउन हामीले उत्कृष्ट प्रदर्शन दिनैपर्छ । यो यस्तो खेल हो जसमा एउटा क्षेत्रमा मात्र राम्रो गरेर हुँदैन । ब्याटिङ, बलिङ र फिल्डिङ सबैमा राम्रो गर्न सक्नुपर्छ,’ जिम्बावेबाट कप्तान पारस खड्काले भने । जिम्बावेसँग शरद भेषावकर र आरिफ शेखले अर्धशतक तथा पारसले ४० रन बनाएका थिए । लिस्ट ‘ए’ मान्यता खेलमा १ हजार रन बनाउने पहिलो नेपाली खेलाडी बन्न पारस ९ रनले मात्र पछाडि छन् ।

 

नेपालको मुख्य चिन्ता त्यही पनि ब्याटिङमै छ । विशेष गरी ओपनिङ जोडी ज्ञानेन्द्र मल्ल र दिलीप नाथ जम्न नसक्दा त्यसले पूरै ब्याटिङमा प्रभाव पार्दै आएको छ । दिलीप जिम्बावेसँग २ रनमै आउट भएका थिए । ज्ञानेन्द्रले ५९ बल खेली ३२ रन बनाएका थिए । ‘हामी सबै खेलाडीको रक्षा गर्छौं तर सबैले उत्तिकै योगदान दिन जरुरी छ,’ पारसले भने, ‘प्रतियोगितामा फरक देखिन ब्याट्सम्यानले ठूलो स्कोर गर्नुपर्ने हुन्छ ।’

 

जिम्बावेसँग नेपाली बलर नराम्रोसँग चुटिएका थिए । त्यो खेलबाटै ललितनारायण राजवंशीले राष्ट्रिय टोलीमा ‘डेब्यू’ गरेका थिए । देव्रेहाते स्पिनर ललितले १० ओभरमा ६२ रन खर्चेर १ विकेट लिएका थिए । उनले स्कटल्यान्डविरुद्ध खेल्ने नखेल्ने निश्चित छैन । अफ्रिकी भ्रमणमा जानुअघि पारस र प्रशिक्षक जगत टमाटाले जिम्बावे र स्कटल्यान्ड स्पिनरका अगाडि केही कमजोर देखिएकाले नेपाली टोलीमा तेस्रो स्पिनरका रूपमा ललित थपिएको बताएका थिए । ललितलाई नखेलाएमा तीव्र बलर करण केसी प्लेइङ ११ मा फर्किने छन् ।

 

स्कटल्यान्ड उत्कृष्ट ब्याटिङ गरिरहेको टोली हो । दाबेदार मानिएको अफगानिस्तानमाथि ७ विकेटको जित हात पार्दा स्कटल्यान्डबाट कालुम म्याकलिओडले १ सय ४६ बलमा नटआउट १ सय ५७ रन बनाएका थिए । स्कटल्यान्डले हङकङलाई ९१ रनमा आउट गरी ४ विकेटको जित पाएको खेलमा भने उनी चाँडै आउट भएका थिए । अफगानिस्तानसँग नखेलेका कप्तान केयल कोएट्जरले नटआउट ४१ रन बनाएका थिए ।

 

स्कटल्यान्डसँग नेपालले यसअघि खेलेका तीनै खेलमा पराजय भोगेको छ । सन् २०१४ मा न्युजिल्यान्डमा भएको विश्वकप छनोटमा नेपाललाई पराजित गर्दै अघि बढेको स्कटल्यान्ड प्रतियोगिता नै जितेर विश्वकपमा पुगेको थियो । त्यसपछि स्कटल्यान्डको आयरमा भएको विश्व क्रिकेट लिग च्याम्पियनसिपका दुवै खेलमा पनि नेपाललाई स्कटल्यान्डले पराजित गरेको थियो । च्याम्पियनसिपको उपविजेता बनेपछि स्कटल्यान्ड विश्वकप छनोटमा सोझै पुगेको थियो ।

 

च्याम्पियनसिपका शीर्ष चारमा नपरेको नेपाल सातौं भई रेलिगेसनमा परी डिभिजन २ मा झरेको थियो । अघिल्लो महिना नामिबियामा सम्पन्न विश्व क्रिकेट लिग डिभिजन २ को फाइनल पुग्दै नेपाल विश्वकप छनोटमा पुगेको हो ।

 

स्कटल्यान्डपछि नेपालले शनिबार अफगानिस्तान र सोमबार हङकङसँग खेल्नेछ । अफगानका विकेटकिपर/ब्याट्सम्यान मोहम्मद शेहजादलाई आगामी दुई खेलका लागि खेल्न प्रतिबन्ध लगाइएको छ, जसको कारण उनले बिहीबार हङकङ र त्यसपछि नेपालसँग हुने खेल गुमाउने छन् । २४ महिनाको अन्तरालमा उनले दोस्रोपल्ट आचारसंहिता उल्लंघन गरेकाले उनीमाथि अन्तर्राष्ट्रिय क्रिकेट परिषद्ले प्रतिबन्ध लगाएको हो ।

प्रकाशित : फाल्गुन २४, २०७४

प्रतिकृया दिनुहोस

जर्मनीको जितमा सानेको गोल

एजेन्सी । लोरी सानेको गोलमा जर्मनीले अन्तर्राष्ट्रिय मैत्रिपूर्ण खेल अन्तर्गत बिहीबार राति रुसलाई ३–० ले पराजित गरेको छ ।  जर्मनीका प्रशिक्षक

आज नेपाल र माल्दिभ्स भिड्दै

काठमाडौं, बिहीबार – साफ यु–१५ च्याम्पियनसिप आज बाट काठमाडौंमा सुरु हुँदैछ। नेपालले पहिलो खेलमा आज माल्दिभ्ससँग खेल्दै प्रतियोगिताको सुरुआत

विराटले तोडे सचिनको १७ वर्ष पुरानो कीर्तिमान

१७ वर्षदेखि सचिन तेन्दुलकर नाममा रहँदै आएको कीर्तिमान भारतीय क्रिकेट टोलीका कप्तान विराट कोहलीले तोडेका छन्। कोहलीले वेस्ट इन्डिजविरुद्ध जारी