स्कटल्यान्डसँग लगातार हार

काठमाडौँ — कप्तान पारस खड्काको अर्धशतकका बावजुद माथिल्लो क्रमका प्रमुख ब्याट्सम्यानले निराश पार्दा नेपाल बिहीबार विश्वकप छनोट क्रिकेटमा स्कटल्यान्डसँग ४ विकेटले पराजित भएको छ । नेपालको यो लगातार दोस्रो हार हो । त्यसविपरीत पहिलो तीन खेल जितेर स्कटल्यान्ड सुपर सिक्समा पुगेको छ । 

जिम्बावेमा भइरहेको प्रतियोगितामा नेपाल पहिलो खेलमा घरेलु टोलीसँग १ सय १६ रनले पराजित भएको थियो । अफगानिस्तानलाई ३ विकेटले हराएको स्कटल्यान्डले मंगलबार दोस्रो खेलमा हङकङमाथि ४ विकेटले जित पाएको थियो ।

 

स्कटल्यान्डसँग नेपाल लगातार चौथो खेलमा पराजित भएको हो । पारसले ६३ रन बनाए पनि टस जितेको नेपाल बुलाबायोस्थित क्वीन्स स्पोर्ट्स क्लबमा ४७.४ ओभरमा १ सय ४९ रन बनाएर अलआउट भयो । केयल कोएट्जरले नटआउट ८८ रन बनाएपछि स्कटल्यान्डले ४२ औं ओभरमा १ सय ५३ रन बनाउँदै जित रच्यो ।

 

कोएट्जरले दीपेन्द्रसिंह ऐरीलाई विजयी छक्का प्रहार गरे । अघिल्लो ओभरमा उनले पारसको बलमा पनि छक्का हानेका थिए । १ सय ३७ बल खेलेका म्यान अफ द म्याच उनको इनिङ्स ७ चौका र ३ छक्का रह्यो । १० औं ओभरमा आफ्नो पहिलो ओभर लिएर आएका लेग स्पिनर सन्दीप लामिछानेले म्याथ्यु क्रसलाई १४ रनमा आउट गरी नेपाललाई पहिलो सफलता दिलाए। त्यतिखेर स्कटल्यान्डसँग ३३ रन थियो ।

 

कालुम म्याकलोइड १५ रन बनाई वसन्त रेग्मीको बलमा आउट भए । सन्दीपले अर्को ओभरमा रिची बेरिङटनलाई १ रनमा एलबीडब्लू आउट गरेपछि स्कटल्यान्ड २० औं ओभरमा ७२–३ को स्थितिमा पुग्यो । जर्ज मुन्सीलाई ललितनारायण राजवंशीले १० रनमै बोल्ड गरे । नेपालको झिनो आशा पलाएको अवस्थामा क्रेग वालेसले कोएट्जरसँग पाँचौं विकेटमा २८ रनको महत्त्वपूर्ण साझेदारी गरे । वालेसलाई १७ रनमा दीपेन्द्रले आउट गरे । मार्क वाट शून्यमा वसन्तको बलमा आउट भए पनि सुरुमा संयमित भएर खेलेका कोएट्जरले त्यसपछि आक्रामक खेल्दै साफयान सरिफसँग मिलेर स्कटल्यान्डलाई जिताए ।

अघिल्लो खेलमा जस्तै नेपालको सुरुआत राम्रो हुन सकेन । ओपनर ज्ञानेन्द्र मल्ल १ रनमै दोस्रो ओभरको पहिलो बलमा बोल्ड भए । अर्को ओभरमा आफूले सामना गरेको पहिलो बलमा चौका प्रहार गरेका दिलीप नाथ लगत्तै अर्को बलमा आउट भए । स्टुवार्ट हिवटिङहमले लगातार दुई विकेट लिने क्रममा दीपेन्द्रसिंह ऐरीलाई १ रनमा एलबीडब्लू र शरद भेषावकरलाई पहिलो बलमै बोल्ड गरे । आरिफ शेख पनि २ रनमा आउट भएपछि नेपाल ८ ओभरमा ३९–५ को स्थितिमा पुग्यो ।

 

पारसले रोहित पौडेलभन्दा माथि पठाइएका सोमपाल कामीसँग मिलेर नेपालको इनिङ्स सम्हाल्ने प्रयास गरे । व्यक्तिगत ९ रन बनाएसँगै पारस नेपालबाट लिस्ट ‘ए’ मा एक हजार रन बनाउने पहिलो खेलाडी बने । उनी ४९ रनमा ब्याटिङ गरिरहेको अवस्थामा सोमपाल सिधा थ्रोमा रनआउट भए । सोमपालले १८ रन बनाए । कुल ७५ बल खेलेका पारसले १० चौका प्रहार गरे । रोहितले १५ र वसन्तले नटआउट २४ रन बनाउँदै नेपालको स्कोर हेर्नलायक बनाए । ५१ बल खेलेका वसन्तले १ चौका प्रहार गरे । सन्दीप ६ र ललितनारायण ४ रन बनाई एलास्डाइर इभान्सको बलमा आउट भए ।

 

नेपालले दुवै खेल जित्नैपर्ने

नेपालले सुपर लिगमा पुग्न शनिबार अफगानिस्तान र सोमबार हङकङसँग हुने दुवै खेल जित्नै पर्नेछ । हङकङले बुधबार समूह ‘बी’ को अर्को खेलमा अफगानिस्तानलाई ३० रनले हरायो । हङकङले शनिबार जिम्बावेसँग खेल्नेछ । हङकङले नेपालसँगको खेल जिते सुपर सिक्स पुग्नेछ । विश्वकप पुग्न दाबेदार मानिएको अफगानिस्तान लगातार तेस्रो खेलमा पराजित भएको छ ।

 

समूह ‘ए’ मा पनि अप्रत्यासित नतिजा आएको छ । यूएईले नेदरल्यान्ड्सलाई ६ विकेटले पराजित गरी ३ खेलमा दोस्रो जित हात पार्‍यो । वेस्ट इन्डिजले जेसन होल्डरको नटआउट ९९ रनमा पपुवा न्युगिनीलाई ६ विकेटले हरायो । वेस्ट इन्डिजले दुवै खेल जितेको छ ।

प्रतिकृया दिनुहोस

जर्मनीको जितमा सानेको गोल

एजेन्सी । लोरी सानेको गोलमा जर्मनीले अन्तर्राष्ट्रिय मैत्रिपूर्ण खेल अन्तर्गत बिहीबार राति रुसलाई ३–० ले पराजित गरेको छ ।  जर्मनीका प्रशिक्षक

आज नेपाल र माल्दिभ्स भिड्दै

काठमाडौं, बिहीबार – साफ यु–१५ च्याम्पियनसिप आज बाट काठमाडौंमा सुरु हुँदैछ। नेपालले पहिलो खेलमा आज माल्दिभ्ससँग खेल्दै प्रतियोगिताको सुरुआत

विराटले तोडे सचिनको १७ वर्ष पुरानो कीर्तिमान

१७ वर्षदेखि सचिन तेन्दुलकर नाममा रहँदै आएको कीर्तिमान भारतीय क्रिकेट टोलीका कप्तान विराट कोहलीले तोडेका छन्। कोहलीले वेस्ट इन्डिजविरुद्ध जारी